Starfssvið

Minjaverðir hafa umsjón með menningarminjum á minjasvæðinu og vinna að verndun þeirra, skráningu og kynningu og hafa með þeim eftirlit.  Minjaverðir leitast við að kynna almenningi, sveitarstjórnum, skipulagsaðilum og öðrum þeim er málið kann að varða, þjóðminjalög, reglugerðir og réttar stjórnsýsluleiðir varðandi umhverfismat og skipulagsmál.  Mikilvægt er að minjaverðir séu í góðu samstarfi við sveitarfélög á svæðinu, ekki síst í tengslum við skipulagsmál, en minjavörður veitir aðstoð og upplýsingar í tengslum við skráningu og varðveislu fornleifa.  Minjaverðir hafa einnig með hús að gera, en samkvæmt 6. gr. laga nr. 104 um húsafriðun, frá 31. maí 2001, ber eigendum friðaðra húsa og húsa sem reist eru fyrir 1918 að leita álits hjá minjaverði og húsafriðunarnefnd ef ráðist skal í breytingar á þeim.

Umsjón með málaflokknum:

Gunnar Bollason, verkefnisstjóri, sími 5556632,  This email address is being protected from spambots. You need JavaScript enabled to view it.
Minjaverðir viðkomandi svæða

Skráningarstarf
Fimmti kafli þjóðminjalaga nr. 107 frá 31. maí 2001 fjallar um kirkjugripi og minningarmörk. Í lögunum kemur meðal annars fram að forstöðumaður Fornleifaverndar ákveður í samráði við þjóðminjavörð friðlýsingu og varðveislu kirkjugripa í kirkjum landsins sem hann telur friðunarverða vegna sögulegs eða listræns gildis þeirra. Gripir hverrar kirkju sem friðlýstir eru skulu skráðir sérstaklega. Einnig er kveðið á um að forstöðumaður friðlýsi þá legsteina eða  önnur  minningarmörk í kirkjugörðum sem hann telur rétt að vernda vegna sögulegs eða listræns gildis þeirra. Samkvæmt lögunum eru kirkjugripir og minningarmörk sem tekin eru á friðlýsingarskrá friðhelg og er óheimilt að raska þeim eða spilla. Fram kemur einnig að Fornleifavernd ríkisins skuli halda nákvæmar skrár yfir minningarmörk og skulu minningarmörk í hverjum kirkjugarði skráð sérstaklega. Skrár þessar lætur Fornleifavernd í té sóknarprestum, próföstum og sóknarnefndum sem hlut eiga að máli.